Саудиялик инвестор Тошкент халқаро аэропорти яқинида 4 юлдузли меҳмонхона қурмоқчи

сен 07 / 2018

Саудия Арабистонининг “Silk Valley commercial services LTD” инвестори Тошкент халқаро аэропортига туташган 1,5 га ҳудудда 4 юлдузли меҳмонхона, резиденц-отель, бизнес маркази, савдо, фитнес ва енгил турдаги қаҳвахоналар қурмоқчи. 6 сентябрь куни Тошкент шаҳар ҳокимлигида ўтган “очиқ эшиклар куни”да ушбу лойиҳа муҳокама қилинди. 

Тошкент шаҳар ҳокими в.б. Жаҳонгир Ортиқхўжаев инвесторга Тошкент шаҳар, Сергели тумани Бобур кўчаси, Ислом Каримов номидаги Тошкент Халқаро аэропортига туташ ҳудуддан 1,5 га ер ажратилиши учун инвестор мазкур туманда 380 ўринлик болалар боғчаси қуриб бериши кераклиги ва Ўзбекистонда ҳисоб-рақам очиб, унга 1 млн АҚШ доллари миқдорида пул маблағи қўйиши лозимлигини таъкидлади. Шунингдек, ушбу лойиҳани амалга ошириш учун инвесторлар томонидан ажратилаётган маблағ бироз камлигини айтиб ўтди ҳамда лойиҳа доирасида мазкур ҳудудда автомобиллар учун кўп қаватли тураргоҳ қурилиши ҳам кўзда тутилиши кераклиги айтилди. 

Ортиқхўжаевнинг сўзларига кўра, мазкур ҳудудда меҳмонхона ва бошқа хизмат кўрсатиш объектларини қуриш лойиҳаси аввалига конкурс асосида маҳаллий тадбиркорлар учун ҳам таклиф этилади. Талабгорлар махсус комиссия томонидан ўрганилиб чиқилгач, ер ҳудуди инвестор ёки маҳаллий тадбиркорлар учун ажратиб берилади. 

“Тошкентнинг марказий ва даромадли бизнес қилиш имконияти бор ҳудудларини барча чет эллик инвесторларга бериб юбориш ҳам ўринли эмас. Биз аввал мазкур жойларга ўзимиздаги маҳаллий тадбиркорларда ҳам талаб бор-йўқлигини ўрганишимиз лозим. Уларга ҳам имконият берилиши шарт”, дейди Тошкент шаҳар ҳокими. 

UZ24: Хабар ва янгиликларни FacebookTwitterTelegram'да ҳам кузатиб боринг

Электрон манзилингиз кўрсатилмайди. Белгиланган майдонлар тўлдирилиши шарт *