Paxtakor xalqaro maydondagi ishtirokini boshlaydi

Kuni kecha Elit Chempionlar Ligasining yangi mavsumi boshlandi. Ayni dam Eronning “Istiqlol” klubi turnir jadvalida birinchi o‘rinda turibdi. Bugun “Paxtakor” ushbu chempionatdagi o‘z yurishini boshlaydi. Jamoani oldinda BAAning "Al-Vasl" klubi kutib turibdi. Uchrashuv soat 19:00 da “JAR” stadionida start oladi. 

“Uchrashuvda imkoniyatlar teng”

OCHL 1-turi doirasidagi “Paxtakor” va BAAning “Al-Vasl” klublari o‘rtasidagi o‘yindan avval mezbonlar bosh murabbiyi Maksim Shatskix o‘z fikrini bildirdi.

“Elit Chempionlar Ligasini yaxshi kayfiyat va ishtiyoq bilan boshlaymiz. Raqibni o‘rgandik, ular chempionatda ikki o‘yin o‘tkazdi. Yaxshi o‘ynaydigan, tajribali futbolchilarga, yaxshi tarkibga ega kuchli raqib. Bahs qiziqarli kechadi deb o‘ylayman. Yigitlarni bellashuvga yaxshi tayyorlashga intildik. Bunday raqib va jamoaga qarshi yigitlarni ruhlantirish shart emas, ular tayyor bo‘lishadi. Birinchi navbatda o‘yindagi intizom bilan raqibni yengish mumkin. Butun bellashuv mobaynida o‘yinga tuzilgan rejalarni bajarishga intilishimiz kerak. Uchrashuvda imkoniyatlar teng. Raqibning uzoq vaqtdan beri Chempionlar Ligasida qatnashmagani katta muammo emas. Biz xohish va ishtiyoq bilan ushbu jamoaga qarshi harakat qilishimiz darkor”, - deydi Maksim Shatskix.

“Tig‘iz taqvimda o‘ynashga to‘g‘ri kelyapti”

“Al Vasl” bosh murabbiyi Milosh Miloyevich ham Elit Osiyo Chempionlar Ligasi 1-tur doirasidagi “Paxtakor”ga qarshi bahs oldidan matbuot anjumanida ishtirok etib, bo‘lajak o‘yin haqida o‘z fikrlarini ma’lum qildi.

“Ertaga bizni qiyin o‘yin kutmoqda. “Paxtakor” juda ham intizomli jamoa. Raqibga hurmat saqlagan holda o‘zimizning eng yaxshi o‘yinimizni ko‘rsatishga harakat qilamiz. Jarohat olganlar? 3 nafar futbolchilarimizdan foydalana olmaymiz. Ularning o‘rnini boshqa o‘yinchilar bilan to‘ldiramiz. Jamoaning jismoniy holati? Tig‘iz taqvimda o‘ynashga to‘g‘ri kelyapti. Bunga moslashishga harakat qilish kerak. Ba’zida futbolchilarga tez-tez o‘ynash yoqadi. “Paxtakor”dan kuchlimizmi? Hozirgi kunda ko‘pchilik jamoalar darajasini futbolchilarning transfer bahosi va qayerdan ekanligiga qarab baholaydi. Lekin barchasi maydonda hal bo‘ladi “Paxtakor” doim o‘z uyida raqiblarga munosib qarshilik ko‘rsata oladi. “Paxtakor”ning yosh o‘yinchilari yaxshi o‘yin ko‘rsatishmoqda. Masalan, Usmonovning o‘yini yaxshi ekan. To‘g‘ri, ular ko‘p gol urishmayapti. Ammo o‘z darvozasidan kam to‘p olib chiqyapti”, — deydi serbiyalik mutaxassis.